眠起， 食糜配菜脯， 煠二粒卵堵肚。 食飽， 走去摘檨。 日頭猛猛， 樹下涼涼。 田內阿伯割稻， 埕頂阿姆曝粟。 池墘蛤虯泅水， 厝後孥囝相耍。

日晝， 返內。 汏米煆飯， 睒著毋油， 截白肉烙朥， 囥入櫥裡。 睇見有曱甴， 挈鞋摜伊， 踐死踏扁， 挼糜擲癟。 截腈肉， 斫肉脞， 炒菠薐。 鼎烏烏， “煙齁齁”。

下旰睇書， 驟然肚困。 抉飯疕， 揾豉油。 鼻工夫茶芳， 睇簷龍食蠓。

暝昏， 割二叢蕹菜， 焯牛肉， 煏魷魚， 啉幾杯酒， 者味過芳。 頭戇戇， 寬寬行去眠床， 衫褲無褪， 倒落即困。 頤半橛， 想定: 呃~ 毋憶得洗浴!